இ-சிகரெட் : இளைஞர்களை தாக்கிவரும் புதிய ஆபத்து

பிரிட்டனில் வசிக்கும் 12 வயதான சாரா கிரிஃபின், கடந்த செப்டம்பரில் ஆஸ்துமா காரணமாக மருத்துவமனையில் அனுமதிக்கப்பட்டார்.

 

மருத்துவமனையில் நான்கு நாட்கள் கோமாவில் இருந்த சாராவின் நிலை தற்போது சீராக உள்ளது. ஆனால் அவரது வேப்பிங் (நிகோட்டின் மற்றும் சுவையூட்டிகளை, அதற்கென வடிவமைக்கப்பட்டிருக்கும் கருவிகள் மூலம் உறிஞ்சுவது)பழக்கம் அவரது நுரையீரல்களை கடுமையாக பாதித்துள்ளது.

 

சாராவின் தாய் மேரி, பிபிசி செய்தியாளர்கள் டொமினிக் ஹூகஸ் மற்றும் லூசி வாட்கின்சனிடம், "டாக்டர்கள் அவளது நுரையீரல்களில் ஒன்று கிட்டத்தட்ட முற்றிலும் அழிந்துவிட்டதாகக் கூறினார்கள். அவளது சுவாச அமைப்பு 12 வயது குழந்தையைப் போன்றது அல்ல, மாறாக 80 வயது முதியவரைப் போன்று உள்ளது" என்று கூறினர்.

 

மேலும் அவர் கூறுகையில், "சிகிச்சையின் போது சாராவின் நிலையைப் பார்த்தபோது, ஒரு கட்டத்தில் நான் என் மகளை இழந்துவிடுவேன் என்று நினைத்தேன். ஆனால், தற்போது சாரா வேப்பிங்கை கைவிட்டுவிட்டாள், மேலும் வேப்பிங் செய்ய வேண்டாம் என மக்களுக்கு விழிப்புணர்வு ஏற்படுத்தி வருகிறாள்" என்று கூறினார்.

 

சாரா ஒன்பது வயது சிறுமியாக இருந்தபோது வேப்பிங்கிற்கு அடிமையானார். அதே நேரத்தில், இந்தியாவில் சிறு பள்ளி மாணவர்கள் வேப்பிங் சாதனங்களை பயன்படுத்தும் சம்பவங்கள் கவலையை தருகின்றன.

 

சில தாய்மார்கள் உருவாக்கிய Mothers Against Vaping என்ற அமைப்பு, கடந்த அக்டோபரில் பெண் எம்.பி.க்களுக்கு எழுதிய கடிதத்தில், தடைசெய்யப்பட்டிருந்தாலும், ஆறு அல்லது ஏழு வயது குழந்தைகளுக்கு இ-சிகரெட் போன்ற பொருட்கள் கிடைப்பது அவர்களின் ஆரோக்கியத்துடன் விளையாடுவதாகும் என கூறியிருந்தனர்.

 

இ-சிகரெட் என்றால் என்ன?

இந்திய அரசு, வேப்பிங்கை தடைசெய்துள்ள போதிலும், இது போன்ற சம்பவங்கள் அதிகரித்து வருவது கவனத்துக்குரியது. வேப்பிங் சாதனங்கள் குழந்தைகளுக்கு எளிதில் கிடைக்காதவாறு உரிய நடவடிக்கைகள் எடுக்கப்பட வேண்டும். மேலும், வேப்பிங்கின் தீமைகள் குறித்து மக்களிடையே விழிப்புணர்வு ஏற்படுத்த வேண்டும்.

 

இ-சிகரெட்டுகள் பேட்டரியில் இயங்குகின்றன. இதில் உள்ள திரவம், பேட்டரியின் உஷ்ணத்தில் சூடாகிறது. அதன் பின்பு அது உறிஞ்சப்படுகிறது.

 

திரவத்தில் பொதுவாக புகையிலை சார்ந்த நிகோடின் இருக்கும். அதை தவிர புரோப்பைலீன் கிளிக்கால், புற்றுநோய் விளைவிக்கும் பொருட்கள், அக்ரோலின், பென்சீன் போன்ற வேதிப்பொருள்கள் மற்றும் சுவையூட்டிகள் பயன்படுத்தப்படுகின்றன.

 

இப்போது இது பேனா, பென் டிரைவ், யூ.எஸ்.பி அல்லது வேறு ஏதாவது பொம்மையின் வடிவிலும் கவர்ச்சிகரமான பேக்கேஜிங்கில் சந்தையில் கிடைக்கிறது. மேலும் வல்லுநர்கள் இந்த வேப்பிங் சாதனங்களின் பயன்பாடு வெளிநாடுகளில் மட்டுமல்லாமல் இந்தியாவிலும் அதிகரித்து வருவதாக கூறுகின்றனர்.

 

வேப்பிங்கின் தீமைகள் குறித்து மக்கள் மத்தியில் விழிப்புணர்வு ஏற்படுத்தப்பட வேண்டும், மேலும் குழந்தைகளுக்கு வேப்பிங் சாதனங்கள் எளிதில் கிடைக்காதவாறு சரியான நடவடிக்கைகள் எடுக்கப்பட வேண்டும்.

 

வேப்பிங்கைப் பற்றிய புள்ளிவிவரங்கள் என்ன சொல்கின்றன?

பிரிட்டனில் சமீபத்தில் நடத்தப்பட்ட ஒரு ஆய்வின் முடிவுகள், 11 முதல் 17 வயதுடைய குழந்தைகளில் ஐந்து பேரில் ஒருவர் வேப்பிங் முயற்சித்திருப்பதைக் காட்டுகின்றன. இது 2020 ஐ விட மூன்று மடங்கு அதிகம்.

 

2021 ஆம் ஆண்டு நடத்தப்பட்ட ஒரு ஆய்வு, 11 முதல் 15 வயதுடைய குழந்தைகளில் ஒவ்வொரு 10 பேரில் ஒருவர் அதைப் பயன்படுத்துவதைக் காட்டுகிறது.

 

வட அயர்லாந்தில் நெஞ்சு, இதயம் மற்றும் பக்கவாதம் அமைப்பின் ஃபிடெல்மா கார்டர் கூறுகையில், “பிரிட்டனில் உள்ள இளம் பருவத்தினர் 17 சதவீதம் பேர் வேப்பிங்கை அடிக்கடி பயன்படுத்துகின்றனர்.

 

இந்த புள்ளிவிவரங்கள் வேப்பிங்கின் பயன்பாடு, குறிப்பாக இளம் பருவத்தினரிடையே அதிகரித்து வருவதை தெளிவாகக் காட்டுகின்றன. இது கவலைக்குரிய விஷயம், ஏனெனில் வேப்பிங் கடுமையான சுகாதார விளைவுகளை ஏற்படுத்தும்” என்றார்.

 

வேப்பிங் புகைபிடித்தலுக்கு ஒரு பாதுகாப்பான மாற்றாக இல்லை என உலக சுகாதார அமைப்பு (WHO) எச்சரித்துள்ளது. உலக நாடுகள் வேப்பிங்கை ஒழுங்குபடுத்துவதற்கும், அதன் பயன்பாட்டுடன் தொடர்புடைய அபாயங்கள் குறித்து பொதுமக்களுக்கு விழிப்புணர்வு ஏற்படுத்துவதற்கும் நடவடிக்கை எடுக்க வேண்டும் என்று உலக சுகாதார அமைப்பு பரிந்துரைக்கிறது.

 

இந்த ஆண்டு ஜூலையில் திங்க் சேஞ்ச் ஃபாரம் என்ற அமைப்பு நடத்திய ஒரு ஆய்வின்படி, இந்தியாவில் 14 முதல் 17 வயதுடைய மாணவர்களில் 96% பேர் வேப்பிங் தடைசெய்யப்பட்டது என்பதை அறியவில்லை மற்றும் 89% பேருக்கு அதன் ஆபத்துகள் என்ன என்பதை யோசிக்கவில்லை.

 

இந்தியாவில் உள்ள உலகளாவிய இளநிலை புகையிலைத் தணிக்கை-4 படி, நாட்டில் உள்ள 2.8% பதின்பருவத்தினர் ஏதாவது ஒரு நேரத்தில் வேப்பிங் பயன்படுத்தியுள்ளனர்.

 

உலக சுகாதார அமைப்பின்படி, புகைபிடிப்பவர்களின் எண்ணிக்கையில் இந்தியா சீனாவுக்கு அடுத்தபடியாக இரண்டாவது இடத்தில் உள்ளது.

 

லான்செட் (சுகாதாரம் குறித்த ஆய்வுக் கட்டுரைகள் வெளியிடும்) பத்திரிகையில் வெளியான ஒரு ஆய்வின்படி, ஒவ்வொரு ஆண்டும் இந்தியாவில் சுமார் 10 லட்சம் பேர் புகைப்பிடிப்பதால் உயிரிழக்கின்றனர்.

 

இந்த புள்ளிவிவரங்கள் மிகவும் கவலைக்குரியவை. வேப்பிங் தரும் தீமைகள் குறித்த விழிப்புணர்வை அதிகரிப்பதற்கான நடவடிக்கைகளை அரசு எடுக்க வேண்டும். மேலும், வேப்பிங்கை ஒழுங்குபடுத்தும் சட்டங்களை உருவாக்க வேண்டும்.

 

குழந்தைகளுக்கான இரட்டை ஆபத்து

வேப்பிங் குழந்தைகளுக்கு இரட்டை அச்சுறுத்தலை ஏற்படுத்துகிறது என மருத்துவர் ராஜேஷ் குமார் குப்தா, ஃபோர்டிஸ் மருத்துவமனை, கிரேட்டர் நொய்டாவின் சுவாச நோய் மற்றும் தீவிர சிகிச்சைக்கான கூடுதல் இயக்குனர் தெரிவிக்கிறார். அவர் பிபிசி நிருபர் ஆர். த்விவேதியிடம் பேசியபோது, " முதலாவதாக, இதில் பயன்படுத்தப்படும் பல்வேறு வேதிப்பொருட்கள், நிகோடின் போன்றவை அவர்களின் நுரையீரலுக்கு தீங்கு விளைவிக்கும். இரண்டாவதாக இ-சிகரெட் பழக்கத்துக்கு ஆளானவர்கள் மிக எளிதாக சிகரெட் பழக்கத்துக்கு அடிமையாகிவிடுகின்றனர்” என்றார்.

 

உலக சுகாதாரத்துக்கான தி ஜார்ஜ் நிறுவனம் நடத்திய ஆய்வின் படி, 15 முதல் 30 வயதிலான இளைஞர்களில் 61% பேர் எதிர்காலத்தில் வேப்பிங் செய்ய தொடங்குவார்கள் என்று கூறுகிறது.

 

அதே நேரம், ஆஸ்திரேலிய தேசிய சுகாதார மற்றும் மருத்துவ ஆராய்ச்சி கவுன்சில் நடத்திய சர்வதேச ஆய்வின் படி, வேப்பிங் செய்யாத பதின்படுவத்தினர் மற்றும் இளைஞர்களில் 31% பேர் எதிர்காலத்தில் அதை உபயோகிக்க தயாராக இருந்தனர்.

 

 

சிகரெட் புகைப்பதை இ-சிகரெட் குறைக்காது

இருபது ஆண்டுகளுக்கு முன்பு, 2003 ஆம் ஆண்டில், இ-சிகரெட்டை உருவாக்கிய சீன மருந்தாளர் ஹான் லிக், அதன் உதவியுடன் மக்கள் எளிதாக புகைப்பதை நிறுத்த முடியும் என்று கூறினார். ஆனால், புகைப்பிடிக்கும் பழக்கத்திலிருந்து விடுபட மக்களுக்கு உதவ உருவாக்கப்பட்ட இ-சிகரெட்டுகள் இப்போது உலகிற்கு ஒரு பெரிய சவாலாக மாறிவிட்டன.

 

இ-சிகரெட்டுகளைப் பயன்படுத்துவது புகைப்பிடிக்கும் பழக்கத்தைக் கைவிட உதவும் என்பதற்கு நம்பகமான ஆராய்ச்சி எதுவும் இல்லை. இ-சிகரெட்டுகளைப் பயன்படுத்துவது புகைப்பிடிப்பதை விட குறைவான ஆபத்தானதா?

 

இந்தக் கேள்வி, இரண்டு வகையான விஷங்களில் எது சிறந்தது என்பதைப் போன்றது என்று கூறுகிறார் மருத்துவர் ராஜேஷ் குப்தா. “இ-சிகரெட்டுகள் மூலம் புகைப்பிடிப்பதை நிறுத்தும் வாய்ப்பு உள்ளது என கூறுவது முற்றிலும் முட்டாள்தனமானது” என்று அவர் கூறுகிறார். ஹார்வர்ட் ஹெல்த் வெளியிட்ட ஆராய்ச்சியின்படி, இ-சிகரெட்டுகளைப் பயன்படுத்தும் நபர்களில் 10 முதல் 14 சதவீதம் பேர் மட்டுமே புகைப்பிடிப்பதை நிறுத்த முடிகிறது.

 

பெற்றோர்களின் கவலை

வினிதா திவாரி, காசியாபாத்தில் வசிக்கிறார். ஒரு புகழ்பெற்ற பள்ளியில் ஆசிரியராக பணியாற்றுகிறார். அவருடைய மகள் இந்த வருடம் கல்லூரியில் சேர்ந்துள்ளார்.

 

பிபிசி செய்தியாளர் ஆர். துவிவேதியிடம் பேசும்போது, தனது மகள் தவறான வழியில் செல்லக்கூடும் என்று தான் எப்போதும் கவலைப்படுவதாக வினிதா கூறுகிறார். அவர் எப்போதும் அவரது செயல்பாடுகளையும், நண்பர்களுடன் என்ன செய்கிறாள் என்பதையும் கவனித்துக்கொண்டே உள்ளார்.

 

ஆனால் இவையெல்லாம் அவ்வளவு எளிதான காரியம் அல்ல. இப்போது மேரியின் கதையைப் பார்த்தால், சாராவின் வேப்பிங் பற்றி அவர் எளிதாகக் கண்டுபிடிக்கவில்லை.

 

பெல்ஃபாஸ்டில் வசிக்கும் சாரா கிரிஃபினின் படுக்கையறை ஒரு சாதாரண குழந்தையின் படுக்கையறை போன்றிருந்தது. மேரி அடிக்கடி அவளுடைய டிரஸ்ஸிங் டேபிளைச் சோதித்துவிட்டு, சில நேரங்களில் மற்ற பொருட்களையும் நகர்த்துவார்.

 

ஆனால் சாரா அவற்றை மறைக்க புதிய வழிகளை கண்டுபிடித்தார். பல முறை அவர் தனது வேப்பிங் சாதனத்தை காலர் கீழ் கூட மறைத்து வைப்பார்.

 

சாராவின் காலை வேப்பிங் புகையுடன் தொடங்கும், இரவில் படுக்கைக்குச் செல்வதற்கு முன் அவள் கடைசியாக செய்யும் காரியம் வேப்பிங் புகையை எடுத்துக்கொள்வதே.

 

அழுத்தம் காரணமாக அடிமையாகும் சிறார்கள்

கான்பூரில் உள்ள பி பி என் பட்டப்படிப்பு கல்லூரியின் உளவியல் துறைத் தலைவர் டாக்டர் அபா சிங், குழந்தைகள் பெரும்பாலும் தங்கள் நண்பர்களின் அழுத்தத்தால் அல்லது புதிய ஃபேஷன் என்று கருதி வேப்பிங் பயன்படுத்தத் தொடங்குவதாகக் கூறுகிறார்.

 

இத்தகைய சூழ்நிலையில், பெற்றோர்கள் இது பற்றி அறிந்திருப்பது மிக முக்கியம், இதனால் அவர்கள் தங்கள் குழந்தைகளுக்கு அதன் தீமைகள் பற்றி கூற முடியும் என்று அவர் நம்புகிறார்.

 

திங்க் சேஞ்ச் ஃபாரத்தின் கணக்கெடுப்பில், 39% இளவயதினர் தங்கள் பெற்றோர், ஆசிரியர்கள் அல்லது ஊடகங்கள் மூலம் இ-சிகரெட்டுகளின் தீங்கு பற்றிய தகவல்களைப் பெற்றதாக ஒப்புக்கொண்டனர்.

 

"கட்டுப்பாடுகள் முறையாக அமல்படுத்தப்படுவதில்லை"

 

இந்தியாவில் இ-சிகரெட்டுகள் 2019 செப்டம்பர் 18 ஆம் தேதி தடைசெய்யப்பட்டன. இதற்காக 2019 டிசம்பர் 5 ஆம் தேதி ஒரு அரசாணை பிறப்பிக்கப்பட்டது. அதன்படி இ-சிகரெட்டுகளின் உற்பத்தி, சேமிப்பு, இறக்குமதி, ஏற்றுமதி, கொள்முதல், விற்பனை ஆகிய அனைத்தும் தடைசெய்யப்பட்டுள்ளன.

 

முதல் முறை குற்றத்திற்காக ஒரு வருடம் சிறை தண்டனை மற்றும் ஒரு லட்சம் ரூபாய் அபராதம் விதிக்கப்படுகிறது.

 

மீண்டும் குற்றவாளியாக கண்டறியப்பட்டால், மூன்று ஆண்டுகள் சிறை தண்டனை மற்றும் ஐந்து லட்சம் ரூபாய் அபராதம் விதிக்கப்படலாம்.

 

கட்டுப்பாடுகள் இருந்தபோதிலும், இ-சிகரெட்டுகள் அல்லது வேப்பிங் சாதனங்கள் எளிதாக கிடைக்கின்றன. இவை ஆன்லைனிலும் வாங்கப்படலாம். பள்ளிகளுக்கு அருகேயும் அவை கிடைக்கின்றன என்பது மிகவும் கவலைக்குரிய ஆபத்தான விஷயம் ஆகும்.

 

வேப்பிங் எதிர்ப்பு தாய்மார்கள் ,பெண் எம்.பி.க்களுக்கு எழுதிய கடிதத்தில் இதை வலியுறுத்தியுள்ளனர். அதில், எம்.பி.க்கள் தடைகளை கண்டிப்பாக அமல்படுத்துவதை உறுதிப்படுத்த முயற்சிக்க வேண்டும் என்று வலியுறுத்தப்பட்டுள்ளது.

 

பிரிட்டனிலும் இதே போன்ற கட்டுப்பாடுகள் உள்ளன. 18 வயதுக்கு உட்பட்டவர்களுக்கு வேப்பிங் சாதனங்களை விற்பனை செய்வது தடைசெய்யப்பட்டுள்ளது. ஆனால் சாரா கிரிஃபினுக்கு அவை கடையிலிருந்தே கிடைத்தது.

 

இந்நிலையில், பிரிட்டனின் பிரதமர் ரிஷி சுனக் கட்டுப்பாடுகளை கடுமையாக்கி வருகிறார். வேப்பிங் சாதனங்கள் மற்றும் சுவையூட்டப்பட்ட மிட்டாய்கள் போன்ற பொருட்களின் பேக்கேஜிங் குழந்தைகளுக்கு கவர்ச்சியாக மாற்றுவதற்கும், கடைகளில் அவற்றை காண்பிப்பதை தடை செய்வதற்கும் பணிகள் மேற்கொள்ளப்பட்டு வருகின்றன.

 

நன்றி::பிபிசி தமிழ்