முழக்கம் நியாயமானதா? - பறுவதம் பாட்டி

 [இது 2012 ஆம் ஆண்டு தீபத்தில் வெளியான  உண்மைகளின் ஒரு அலசல். தற்போதும் இந் நிலை தொடர்வதால் மீள் பதிவு செய்யப்படுகிறது.]

அன்று பாடசாலையின் விடுமுறை என்பதால் விடிந்து நெடுநேரமாகியும் புரண்டு படுத்துக் கொண்டிருந்தேன்.

அடுத்த அறையிலிருந்து தொலைபேசியின் அலறல் கேட்டு என் காதுகளை நீட்டிக்கொண்டேன் 

 நான் எதிர்பார்த்தது போல் ,மாமா வீட்டில் வாழும் அண்ணாமலைத் தாத்தாவின் தொலைபேசி அழைப்பேதான். பாட்டி  போனை ஸ்பீக்கரில் விட்டு பேசிக்கொண்டிருந்தது தெளிவாகக்கேட்டது.

“புதினம் படிச்சியே பறுவதம்?”என்று அண்ணாமலைத் தாத்தா ஆரம்பித்துக்கொண்டார்.

“எந்தப் புதினத்தை சொல்லுறியள்?”

“இந்தியாவில டெல்லி மாணவி கற்பழிப்பு சம்பவத்தைத் தொடர்ந்து தினமும் பெண்கள் கற்பழிக்கப்படும் தகவல்கள் அடுத்தடுத்து அதிர்ச்சி அளிக்கும் வகையில் வெளியானபடி உள்ளது. ஒரு காலத்தில ஆன்மீகத்தில அமிழ்ந்திருந்த நாடு இந்தியா. இப்ப அங்க நடக்கிற கேவலங்களை கேட்க கேட்க காதே கூசுது. அண்மையில கிடைச்ச  புள்ளி விவரங்கலின்படி  கடந்த 40 ஆண்டுகளில் நாட்டில் பாலியல் வன்புணர்ச்சி 800 சதவிகிதம் அதிகரித்துள்ளது என்பது கவலையான சேதி.முன்பு எப்போதுமே இல்லாதவாறு, பெண்களுக்கு ஆபத்து நிறைந்த ஒரு நாடாக இந்தியா இப்போது விளங்குகிறது.” அப்பிடியெல்லொ பத்திரிகையிலை எழுதுறாங்கள்.

பாட்டி தொடர்ந்தாள்.

“இந்தியாவில சிலபிரசித்தி பெற்ற IAS,IPS அதிகாரிகள், அமைச்சர்கள், வழக்கறிஞர்கள்,மருத்துவர்கள் ,chartered accountants நிகழ்த்தும் ஊழல்கள்,கயவாளித்தனங்கள்,பாலியல் குற்றங்கள் இவற்றை அசட்டை

செய்வதன் மூலம் குற்றவாளிகள் ஊக்குவிக்கப்படுகிறார்கள்.

திரைப்படங்களில் வரும், பெண்களை இழிவு படுத்தும் காட்சிகளை,காவல் நிலையத்தில் நடைபெறும் கற்பழிப்பு காட்சிகளையும் தொலைக்காட்சி “சீரியல்களில் வரும் “கணவன் மனைவியை பெட்ரோல் ஊற்றி எரித்தல்”,”ஒரு பெண், ஹிட்லரை விட மோசமான குணநலங்களுடன் தன் புகுந்த வீட்டில் அனைவரையும் பழிவாங்கி இரத்தம் பீச்சிட கொலை செய்தல்,கள்ளத் தொடர்புகள்,கடத்தல்கள்” ஆகிய காட்சிகளை வருடக்கணக்கில்,குழந்தை குட்டிகளுடன் வரவேற்பறையில் இருந்து ரசித்துப்பார்ப்பதன் மூலம் அக்குற்றங்கள் நியாயப்படுத்தப்படுகின்றன, ஊக்குவிக்கப்படுகின்றன.

இதே சானல்களில், செய்திகள் என்ற போர்வையில் ஒரு போலி சாமியாரும் ஒரு  பெண்ணும் நிகழ்த்தும் லீலைகள் ஒளிபரப்பு செய்யப்பட்டால் சிரித்து மகிழ்வதுடன்,அவரை தேடிச்சென்று கடவுளாய் வணங்கி குற்றங்களை ஏற்றுக்கொள்கிறோம்.

தொலைக்காட்சியில் சிறுமிகள் உட்பட சிறுவர்களை காதல்,மற்றும் கள்ளத்தொடர்புகள் தொடர்பான நாடக காட்சிகளில் நடிக்கச்செய்து அவர்களைப் பாராட்டி மகிழ்கிறோம்.

எனப் பலவழிகளில் முள்ளுச்செடி விதைகளை காலம் காலமாக விதைத்துக்கொண்டு அவை வளர்ந்து குத்துகிறது என இடும் முழக்கம் நியாயமானதா? இவற்றை எல்லாம் ஊக்குவித்து வளர்த்துக்கொண்டு அதன் பலன்களை கண்டு பொங்கி எழுவதில் என்ன பயன்?”

"நல்லாச் சொன்னாய் பறுவதம்"பாட்டியின் கருத்தில் அண்ணாமலைத் தாத்தாவும் இணைந்துகொண்டார்.

நானும் பாட்டியின் கருத்துக்களைச் சிந்தித்தவாறு மறுபக்கம் புரண்டு படுத்துக் கொண்டேன்.

                               --செல்லத்துரை-மனுவேந்தன்